Հանրապետական կուսակցության «քաղաքական խարակիրին»
Ազգային ժողովն ընտրելու է ՀՀ 15-րդ վարչապետ։ Եթե Հայաստանում չլիներ լուրջ քաղաքական ճգնաժամ, լեգիտիմ խորհրդարանական մեծամասնություն ունեցող կուսակցությունը վարչապետի ընտրության խնդիր չպետք է ունենար։
ՀՀԿ խմբակցության «քաղաքական աբսուրդը» սկսվում է նրանից, որ մեծամասնությունը ներկայացնող ուժը չունի իր թեկնածուն։ Ստացվում է, որ իշխող կուսակցության մեջ գեթ մեկ «շնչող էակ» չկա, ով կարող է լինել երկրի վարչապետ։ Դա էլ է պարզ, քանի որ ցանկացած քաղաքական գործչի առաջադրել վարչապետի պաշտոնին կնշանակի այդ անձի «քաղաքական ոչնչացումը»։
Չունենալով թեկնածություն՝ Հանրապետական խմբակցությունը որդեգրում է մի սկզբունք․ «Փոքրամասնություն ունեցող քաղաքական ուժը չի կարող նշանակել վարչապետ»։ Դրանից ելնելով՝ Հանրապետական կուսակցությունը փորձում է տարատիպ, երբեմն անհեթեթ փաստարկներով «աղավաղել» վարչապետի միակ թեկնածու կերպարը։ Սակայն նման դիրքորոշմամբ Հանրապետական կուսակցությունն կարող է առաջացնել ժողովրդի հույժ դժգոհությունը՝ իր համար «քաղաքական փոս» փորելով։
Ներկա պլանով Հանրապետական կուսակցությունը փորձում է հասնել արտահերթ ընտրությունների, որը տեղի կունենա հունիսի կեսերին։ Պահպանելով իշխանությունը՝ ՀՀԿ-ն հավակնում է ապահովել ընտրությունների վերահսկողությունն, արդյունքում՝ վերաարտադրվել։
Սակայն անգամ Հանրապետականների կողմից կազմակերպվող ընտրությունների ելքը կարող են անկախատեսելի լինել, քանի որ ժողովրդական զանգվածի «հաղթական էյֆորիան» կարող է իշխանության բերել հենց «ժողովրդի թեկնածուին»։ Իսկ խորհրդարանական ընտրությունների վերջնական արդյունքները ՀՀԿ-ին կարող են տանել «քաղաքական պերիֆերիա»։