Ֆրանսիայի ներքաղաքական կյանքը ենթարկվում է ֆունդամենտալ փոփոխությունների

Ֆրանսիայի ծայրահեղ աջ «Ազգային Միավորում» կուսակցության առաջնորդ Մարին Լը Պենին հինգ տարով արգելվել է զբաղեցնել հանրային պաշտոն՝ ԵՄ միջոցները յուրացնելու մեջ մեղավոր ճանաչվելուց հետո, հաղորդում են Reuters-ը և ֆրանսիական լրատվամիջոցները։ Այս որոշումը շրջադարձային պահ է ֆրանսիական քաղաքականության մեջ, քանի որ այն խոչընդոտում է նրա՝ 2027 թվականի նախագահական ընտրություններին մասնակցելու հույսերը և քաոսի մատնում նրա կուսակցությունը՝ վերջին տարիներին ժողովրդականության աննախադեպ աճից հետո: Լայնորեն սպասվում է, որ Լը Պենը կբողոքարկի դատավճիռը։

Ավելի վաղ երկուշաբթի օրը Լը Պենը և կուսակցության Եվրոպական խորհրդարանի ութ պատգամավորներ մեղավոր էին ճանաչվել յուրացման մեջ։ Այնուհետև դատարանը հայտարարեց, որ Լը Պենի և մյուս ամբաստանյալների կողմից կատարված հանցագործությունները արժանի են հանրային պաշտոն զբաղեցնելու անհապաղ արգելքի, ինչը թույլ չի տա նրան առաջադրվել 2027 թվականի նախագահական ընտրություններում։ Լը Պենը նաև դատապարտվել է չորս տարվա ազատազրկման՝ երկու տարին պայմանական և երկուսը՝ էլեկտրոնային թևնոց կրելով, և տուգանվել 100,000 եվրոյով, թեև այս պատիժները չեն կիրառվի, քանի դեռ բողոքարկման գործընթացները շարունակվում են: Սակայն հանրային պաշտոն զբաղեցնելու արգելքն անհապաղ ուժի մեջ է մտնում։

Հաղորդվում է, որ ծայրահեղ աջ առաջնորդը լքել է դատարանի դահլիճը՝ նախքան կլսեր, թե որքան ժամանակով իրեն կարող են արգելել առաջադրվել հանրային պաշտոնում: Այս արդյունքը քաոսի է մատնում Ֆրանսիայի հզոր աջ թևը, քանի որ Լը Պենը հաջորդ նախագահական ընտրություններից առաջ առաջատարն էր հասարակական կարծիքի հարցումներում։ «Ազգային Միավորում» կուսակցության նախագահ և Լը Պենի աջ ձեռքը համարվող Ժորդան Բարդելան դատավճռից հետո մեկնաբանել է, որ «այսօր անարդարացիորեն դատապարտվում է ոչ միայն Մարին Լը Պենը, այլ մահապատժի է ենթարկվում ֆրանսիական ժողովրդավարությունը», — գրել է նա X սոցիալական հարթակում։

 Ֆրանսիան պաշտպանական կարողությունների զարգացման հեղափոխական քայլ է կատարում

Լը Պենի քաղաքական դաշնակիցները Եվրոպայում համախմբվեցին դժվարության մեջ հայտնված քաղաքական գործչի շուրջ դատավճռի հրապարակումից հետո։ Հունգարիայի աջակողմյան վարչապետ Վիկտոր Օրբանը դատարանի որոշումից հետո X-ում գրել է՝ «Ես Մարինն եմ», մինչդեռ Իտալիայի փոխվարչապետ և պոպուլիստական «Լիգա» կուսակցության ղեկավար Մատեո Սալվինին հայտարարել է, որ Փարիզի դատարանը «դատապարտել է Մարին Լը Պենին»՝ նախազգուշացնելով, որ դա հետևանքներ կունենա ԵՄ-ի համար։ «Մարին Լը Պենի դեմ կայացված դատավճիռը Բրյուսելի կողմից պատերազմի հայտարարում է այն ժամանակ, երբ [Եվրոպական հանձնաժողովի նախագահ Ուրսուլա] Ֆոն դեր Լայենի և [Ֆրանսիայի նախագահ Էմանուել] Մակրոնի ռազմատենչ մղումները սարսափեցնում են։ Մեզ չեն վախեցնի, մենք չենք կանգնի. ամբողջ թափով առաջ, իմ բարեկա՛մ»։

Դատավճիռ

Լը Պենը և նրա «Ազգային Միավորւմ» քաղաքական կուսակցության 24 այլ անդամներ մեղադրվում էին Եվրոպական խորհրդարանի ավելի քան 3 միլիոն եվրո (3,3 միլիոն դոլար) միջոցները վատնելու մեջ՝ փոխարենը Ֆրանսիայում տեղակայված աշխատակիցներին վճարելու համար։ Լը Պենը և այլ ամբաստանյալները հերքել էին մեղադրանքները, մինչդեռ կուսակցությունը դատավարությունը որակում է որպես քաղաքական դրդապատճառներով պայմանավորված վհուկների որս։

Եվրախորհրդարանի պատգամավորների հետ միասին դատվող տասներկու օգնականները նույնպես մեղավոր են ճանաչվել գողոնն ընդունելու մեջ։ Դատարանը գնահատել է, որ ընդհանուր վնասը կազմել է 2,9 միլիոն եվրո՝ Եվրոպական խորհրդարանին «ստիպելով հոգալ այն մարդկանց ծախսերը, ովքեր իրականում աշխատում էին» ծայրահեղ աջերի կուսակցության համար, հաղորդում է BFM TV-ն։

Պետական մեղադրողները պահանջել էին ամենախիստ պատիժները Լը Պենի և կուսակցության այլ պաշտոնյաների համար՝ անցած տարվա վերջին պահանջելով, որ մեղավոր ճանաչվելու դեպքում Լը Պենին անհապաղ հինգ տարով արգելվի զբաղեցնել հանրային պաշտոն՝ կիրառելով այսպես կոչված «նախնական կատարման» միջոցը, որը կանտեսեր բողոքարկման ցանկացած գործընթաց, հաղորդում է Reuters-ը։ Այնուամենայնիվ, գործակալությունը նշում է, որ դատավորները կարող են ընդունել, փոփոխել կամ անտեսել մեղադրողների պահանջները։

Դատավճռից առաջ Լը Պենն ասել էր, որ հույս ունի, որ Փարիզի քրեական դատարանի դատավորները ներողամտություն կցուցաբերեն։

Լը Պենի դատավարությունը ստվերել է «Ազգային Համախմբման» վերջին տարիների զգալի վերածնունդը. կուսակցությունը հաղթել էր անցյալ ամռան արտահերթ խորհրդարանական ընտրությունների առաջին փուլում, նախքան երկրի ձախակողմյան դաշինքի հաղթանակը երկրորդ փուլում։

Ֆրանսիան նախորդ տարի քաղաքական քաոսի մեջ հայտնվեց այն բանից հետո, երբ Մակրոնը ԵՄ ընտրություններում ծանր պարտություն կրելուց հետո արտահերթ ընտրություններ նշանակեց։ Այնուհետև նախագահը նշանակեց կենտրոնամետ Միշել Բարնիեին՝ փոքրամասնության պահպանողական կառավարությունը գլխավորելու համար, սակայն սա կարճատև եղավ, քանի որ կառավարությունը, ի վերջո, չկարողացավ ստանալ ձախերի և աջերի աջակցությունը 2025 թվականի բյուջեի իր նախագծերի համար։

Ինչպիսի դեր է պատրաստ ստանձնել Եվրոպան ապագա աշխարհակարգում

Ֆրանսուա Բայրուի գլխավորած նոր կենտրոնամետ կառավարությանը հաջողվեց հաստատել բյուջեն՝ ձախերին զիջումներ անելուց հետո, սակայն այն շարունակում է խոցելի մնալ ինչպես ձախերի, այնպես էլ աջերի քաղաքական ճնշումների նկատմամբ։