ԵՄ-ի ամենավատ մղձավանջը

Հոլանդացի ընտրողներին ուղղված Գերտ Վիլդերսի բորբոքված խոսքի մեկ տողը ավելի շատ է հետապնդելու Բրյուսելին. Եվրամիությունից դուրս գալու հանրաքվեն: Այս մասին գրում է POLITICO-ն:

Եվ մինչ Վիլդերսը մեղմացրեց իր հակաիսլամական հռետորաբանությունը վերջին շաբաթներին, չկան նախանշաններ, որ նա ցանկանում է թուլացնել իր եվրոսկեպտիկիզմը ընտրություններում իր ցնցող հաղթանակից հետո:

Նույնիսկ եթե հոլանդացի ընտրողներին չհամոզեն հետևել բրիտանացիներին ԵՄ-ից դուրս գալու համատեքստում — հարցումները ցույց են տալիս, որ դա քիչ հավանական է —  կան բոլոր նշանները, որ Վիլդերսի գլխավորած կառավարությունը Հաագայում դեռևս մղձավանջ կլինի Բրյուսելի համար:

ԵՄ գագաթնաժողովի սեղանի շուրջ Վիլդերսի տեղը կփոխի դինամիկան՝ արդեն պաշտոնում գտնվող այլ ծայրահեղ աջ և ազգայնական առաջնորդների կողքին: Հանկարծ քաղաքականությունը՝ սկսած կլիմայական գործողություններից, մինչև ԵՄ բարեփոխումները և Ուկրաինայի համար զենքերը, կկանգնի քննարկման և նույնիսկ կենթարկվի հակադարձման:

Էքզիթ փոլի հայտարարումից ի վեր, աջ կենտրոնամետ հնարավոր գործընկերները չեն բացառել, որ կոալիցիա կկազմեն Վիլդերսի հետ, որը բացահայտ հաղթող է ճանաչվել: Սա չնայած այն հանգամանքին, որ վերջին 10 տարիների ընթացքում նրան դուրս են պահել կենտրոնամետները:

Մոլորակը կործանվում է․ հրատապ քայլեր են անհրաժեշտ

Իր հերթին, 60-ամյա վետերանը, կարծես, լրջորեն մտածում է այս անգամ իշխանությունը վերցնելու մասին:

Չորեքշաբթի երեկոյան, երբ արդյունքները պարզ էին, Վիլդերսն ավելի հստակ արտահայտվեց. «Ես շատ լավ հասկանում եմ, որ կուսակցությունները չեն ցանկանում լինել կառավարությունում կուսակցության հետ, որը հակասահմանադրական միջոցներ է ուզում»,- ասաց նա։«Մենք չենք պատրաստվում խոսել մզկիթների, Ղուրանի և իսլամական դպրոցների մասին»:

Նույնիսկ եթե Վիլդերսն իշխանության դիմաց պատրաստ է հրաժարվել ԵՄ-ի հանրաքվե անցկացնելու իր պահանջից, նրա հաղթանակը, այնուամենայնիվ, սարսուռ կպատճառի ԵՄ կառույցներին:

Եվ եթե կենտրոնամետ կուսակցությունները միավորվեն Վիլդերսին դուրս պահելու համար — կրկին — հետագայում հնարավոր է անհրաժեշտ լինի գին վճարել հոլանդացի ընտրողներին:

Brexit-ի քարոզիչ Նայջել Ֆարաջը ցույց տվեց Միացյալ Թագավորությունում, որ պետք չէ իշխանության ղեկին լինել հզոր ազդեցություն ունենալու համար:

Փոփոխությունների քամիներ

Նիդերլանդների ընտրություններում գերիշխող խնդիր էր միգրացիան: ԵՄ քաղաքական գործիչների համար սա մնում է հրատապ մտահոգություն: Քանի որ միգրանտների թիվը շարունակում է աճել — նույնքան էլ Եվրոպայի շատ երկրներում — աջակցություն է ցուցաբերվում ծայրահեղ աջ կուսակցություններին: Նախորդ տարի Իտալիայում Ջորջիա Մելոնին իշխանություն եկավ, Ֆրանսիայում Մարին Լը Պենի Ազգային միչավորումը շարունակում է մնալ հզոր ուժ՝ երկրորդ տեղում լինելով հարցումներում: Գերմանիայում «Այլընտրանք Գերմանիայի համար» կուսակցությունը նույնպես վերջին ամիսներին բարձրացել է երկրորդ տեղ:

Ձախերի համար Նիդերլանդների լուսավոր կետը լեյբորիստների և կանաչների միջև լավ կազմակերպված դաշինքի ուժեղ ցուցադրումն էր: Եվրահանձնաժողովի նախկին փոխնախագահ Ֆրանս Թիմերմանսը աջակցություն ցուցաբերեց: Բայց նույնիսկ այդ միասնական ուղեգիրը չէր կարող մոտենալ Վիլդերսի արդյունքներին:

Հաջորդ հունիսին ԵՄ 27 երկրներում տեղի կունենան Եվրախորհրդարանի ընտրություններ։ Նույն օրը ընտրողները ընտրում են իրենց Եվրախորհրդարանի պատգամավորներին, Բելգիայում անցկացվում են համընդհանուր ընտրություններ։