Ինչպես է էմանուել Մակրոնը պատկերացնում Իրան-Իսրայել կոնֆլիկտի լուծումը
Ի պատասխան Իսրայելի և Իրանի միջև լարվածության աճին՝ Ֆրանսիան իր եվրոպական գործընկերների հետ նախաձեռնում է դիվանագիտական ջանքեր՝ առաջարկելու «խիստ համաձայնեցված կարգավորում»։ Այս քայլը ձեռնարկվել է այն բանից հետո, երբ Ֆրանսիայի նախագահ Էմանուել Մակրոնը չորեքշաբթի օրը պաշտպանության հարցերով կաբինետի նիստից հետո իր արտգործնախարար Ժան-Նոել Բարրոյին հանձնարարել է ղեկավարել այդ ջանքերը։ Այս մասին գրում է POLITICO-ն։
Թեև առաջարկի մանրամասները դեռևս չեն հրապարակվում, Ֆրանսիան E3 խմբի անդամ է՝ Միացյալ Թագավորության և Գերմանիայի հետ միասին, որը պատմականորեն ներգրավված է եղել Իրանի հետ միջուկային բանակցություններում։ Եվրոպացի պաշտոնյան հաստատել է, որ ԵՄ բարձրաստիճան դիվանագետ Կայա Կալլասը ուրբաթ օրը Ժնևում կմիանա իր E3 գործընկերներին՝ Իրանի արտգործնախարարի հետ բանակցություններին՝ նպատակ ունենալով քննարկել իրավիճակը և Իրանին հորդորել վերադառնալ բանակցությունների սեղան։ Այս առերես հանդիպումը հաջորդում է չորս կողմերի միջև վերջին հեռախոսազրույցին։
Ֆրանսիայի կողմից բանաձևի առաջ մղումը հաջորդում է Մակրոնի ավելի վաղ փորձին՝ քննարկելու Իսրայելի և Իրանի միջև հնարավոր հրադադարը ԱՄՆ նախագահ Դոնալդ Թրամփի հետ Կանադայում կայացած G7 գագաթնաժողովի ժամանակ։ Սակայն Թրամփը հրապարակայնորեն մերժեց Մակրոնի մեկնաբանությունները։
Չորեքշաբթի օրը Մակրոնը նաև մտահոգություն հայտնեց իսրայելական հարվածների ընդլայնվող շրջանակի կապակցությամբ՝ նշելով, որ դրանք ավելի ու ավելի են թիրախավորում այնպիսի օբյեկտներ, որոնք կապված չեն Իրանի միջուկային և բալիստիկ ծրագրերի հետ, և կոչ արեց դադարեցնել ռազմական գործողությունները քաղաքացիական անձանց և ոչ միջուկային թիրախների դեմ։ Չնայած եվրոպական երկրների զսպվածության կոչերին, նրանց դիվանագիտական ջանքերը, կարծես, քիչ ազդեցություն են ունեցել Վաշինգտոնի և Իսրայելի վրա։
