Սերբիան Արևմուտքի ճնշման տակ է Կոսովոյի հարցով գործարքի հասնելու համար.Վուչիչ

Սերբիան արևմտյան հզոր երկրներից վերջնագիր է ստացել՝ կարգավորել հարաբերությունները Կոսովոյի հետ, հակառակ դեպքում՝ դիմակայելու այնպիսի միջոցների, որոնք «մեծ վնաս» կհասցնեն երկրին, ասել է նախագահը։ Այս մասին հայտնում է AL JAZEERA-ն:

Երկուշաբթի երեկոյան նախագահ Ալեքսանդր Վուչիչն ասաց, որ իրեն առաջարկ է ներկայացվել՝ որպես Կոսովոյի հետ երկար եռացող լարվածությունը լուծելու Արևմուտքի ջանքերի մաս, նախորդ շաբաթ Եվրամիության, Ֆրանսիայի, Գերմանիայի, Իտալիայի և Միացյալ Նահանգների ներկայացուցիչների հետ հանդիպման ժամանակ։

«[Նրանք] ասացին՝ դուք պետք է ընդունեք այս ծրագիրը, այլապես կկանգնեք եվրաինտեգրման գործընթացի ընդհատման, ներդրումների դադարեցման ու դուրսբերման, համապարփակ տնտեսական ու քաղաքական միջոցառումների, որոնք մեծ վնաս կհասցնեն Սերբիայի Հանրապետությանը»,- ասել է Վուչիչը:

Ելույթ ունենալով հեռուստատեսային մամուլի ասուլիսի ժամանակ՝ Վուչիչն ասել է, որ Սերբիայի խորհրդարանը պետք է քննարկի առաջարկը և ակնարկել հնարավոր հանրաքվեի մասին։ Նա ընդգծել է, որ առանց ԵՄ-ի Սերբիան կդառնա «մեկուսացված»։

Սերբիա-Կոսովո հարաբերությունների կարգավորման Արևմուտքի նոր ծրագիրը պաշտոնապես չի հրապարակվել։ Վուչիչն իր հեռուստաուղերձում ասել է, որ ծրագիրը նախատեսում է, որ Սերբիան դեմ չի լինի Կոսովոյի անդամակցությանը միջազգային կազմակերպություններին, այդ թվում՝ ՄԱԿ-ին։

ԱՄՆ-ն և ԵՄ-ն ցանկանում են առաջ մղել ԵՄ-ի միջնորդությամբ երկխոսությունը, որը ամիսներ շարունակ փակուղում է մնացել, քանի որ վախենում են, որ Ռուսաստանը՝ Սերբիայի դաշնակիցը, կարող է փորձել անկայունություն առաջացնել Բալկաններում՝ ուշադրությունը շեղելու Ուկրաինայի պատերազմից:

«Այս բանակցությունները վերջին տասնամյակում ամենադժվարն էին»,- հավելել է Վուչիչը՝ նկարագրելով հանդիպումը։ «Երբեք այսպես չի եղել»:

ԵՄ դիվանագիտության ղեկավար Ժոզեպ Բորելը երկուշաբթի ասել է, որ Կոսովոյում և Սերբիայում կայացած հանդիպումները կենտրոնացել են «հարաբերությունների կարգավորման առաջարկի քննարկումների վրա։ Մենք շեշտել ենք, որ այս առաջարկի առաջխաղացումը զգալի օգուտներ կբերի երկու կողմին էլ»։

Սերբիան ավելի քան մեկ տասնամյակ ԵՄ-ին անդամակցելու թեկնածու է, և Կոսովոյի հետ հարաբերությունների կարգավորումը հիմնական պայմանն է եղել հայտը առաջ տանելու համար:

«Սերբիան պետք է մնա ԵՄ-ի իր ճանապարհին… քանի որ առանց դրա մենք կորած կլինեինք, տնտեսապես և քաղաքականապես։ Եթե մենք մենակ ու մեկուսացված լինենք, դա այն չէ, ինչ ես կընդունեի որպես նախագահ»,- ասել է Վուչիչը։

Վուչիչն ասել է, որ կարծում է, որ Կոսովոյի հարցի լուծման վրա ճնշումը «փոխված աշխարհաքաղաքական հանգամանքների» արդյունք է։