ԱՄՆ պարտքը…
Երեքշաբթի Fitch վարկանիշային գործակալությունը ԱՄՆ-ին զրկեց բարձրագույն AAA վարկային ռեյտինգից և իջեցրեց այն մեկ աստիճանով մինչև AA+, որն առաջին անգամն էր 2011 թվականից ի վեր: Գործակալությունը նշել է «կառավարման վատթարացումը»՝ կապված ԱՄՆ մշտական ճգնաժամերի հետ պարտքի սահմանաչափի շուրջ: Գործակալությունն իր որոշումը հիմնավորել է «կրկնվող փակուղային իրավիճակների» հետևանքներով՝ բխող պարտքի սահմանաչափի վերաբերյալ խորհրդակցություններից Նախագահի և Կոնգրեսի միջև։ Այս մասին գրում է ֆրանսիական LE POINT-ը:
Դեմոկրատ Ջո Բայդենի կառավարությունը և հանրապետական ընդդիմությունը հունիսի սկզբին, մի քանի ամիս լարված քաղաքական պայքարից հետո, պայմանավորվածություն ձեռք բերեցին բարձրացնել պարտքի սահմանաչափը և կանխել դեֆոլտը ԱՄՆ-ում։ Այնուամենայնիվ, Fitch-ի կարծիքով, չնայած այս համաձայնագրին, «պարտքի սահմանաչափի շուրջ կրկնվող քաղաքական բախումները և վերջին րոպեին կայացվող որոշումները խաթարում են վստահությունը ֆինանսական համակարգի կառավարման նկատմամբ»:
Մայիսի վերջին Fitch-ը նախազգուշացրել էր, որ կարող է իջեցնել ԱՄՆ վարկանիշը՝ դեֆոլտի ռիսկի պատճառով։ Եվ ահա նախազգուշացումը իրաանություն դարձավ:
«Միջնաժամկետ հարկաբյուջետային ծրագրի» բացակայություն
Մեկ այլ պատճառ, թե ինչու գործակալությունը ի վերջո նվազեցրեց «AAA» վարկանիշը Ամերիկայի համար, «բյուջետային իրավիճակի վատթարացումն էր, որը սպասվում է առաջիկա երեք տարիների ընթացքում»: Ինչպես նաև «մեծ ու աճող պարտքային բեռը պետության վրա »։ «Կառավարությունը չունի միջնաժամկետ հարկաբյուջետային ծրագիր՝ ի տարբերություն զարգացման նույն մակարդակ ունեցող երկրների մեծ մասի»։ Բացի այդ, ձևավորվել է մարդկանց համար անհասկանալի բարդ ֆինանսական մեխանիզմ։ «Այս գործոնները մի շարք տնտեսական ցնցումների, հարկերի կրճատման և հարկաբյուջետային նոր որոշումների հետ միասին նպաստել են պարտքի հետևողական աճին վերջին տասնամյակի ընթացքում», — նշում է Fitch-ը:
«Ավելին, միջնաժամկետ նպատակներին հասնելու հարցում միայն աննշան առաջընթաց է գրանցվել՝ կապված կենսաթոշակային և առողջապահական ապահովագրության արժեքի բարձրացման հետ բնակչության ծերացման պատճառով»,- հավելում է վարկանիշային գործակալությունը։