«Գրին քարտի» փոխարեն «RAISE ACT». Թրամփը ներկայացրել է ԱՄՆ-ում մշտական բնակության իրավունքի նոր մեխանիզմ
Օգոստոսի 2-ին ԱՄՆ նախագահ Դոլանդ Թրամփը Սպիտակ տանը հայտարարել է, որ վերջին կես դարի ընթացքում միգրացիոն քաղաքականության մեջ ամենանշանակալի փոփոխությունն է կատարվելու: «Գրին քարտի» խաղարկությունների փոխարեն Թրամփն առաջարկում է ներդնել արժանիքների վրա հիմնված այսպես կոչված «RAISE ACT» (Reforming American Immigration for Strong Employment Act) մեխանիզմը:
Եթե «Գրին քարտի» միջոցով մասնագիտական ցածր գիտելիքներ ունեցող անձինք կարող էին ստանալ ԱՄՆ մշտական բնակության իրավունք, ապա «RAISE» («Վերելք») նախագծով ենթադրվում է միավորների համակարգի ներդրում, որի դեպքում կկարևորվեն մասնագիտական հմտությունները, անգլերենի իմացությունը, ինչպես նաև սեփական ընտանիքը ֆինանսապես ապահովելու ունակությունը:
Սպիտակ տան դիտարկմամբ արժանիքների հիմքով միգրացիայի այս նախագծով ԱՄՆ-ում հնարավոր կլինի կրճատել աղքատությունը, բարձրացնել աշխատավարձերը և խնայել հարկատուների միլիարդավոր դոլարները:
Այս օրինագծի համահեղինակներն են հանրապետական սենատորներ Թոմ Քոթոնը և Դեյվիդ Փեյդուն, ովքեր այն ներկայացրել էին դեռ 2017 թվականի փետրվարի 17-ին:
Օրինագծի հաստատման համար այն պետք ստանա ԱՄՆ Սենատում 60 ձայն, այսինքն Հանրապետական 52 սենատորներին պետք է պարտադիր միանան նաև որոշ Դեմոկրատներ, որոնց թիվը 46-ն է, ևս 2 սենատոր անկախ են: Սա բավականին բարդ գործընթաց կլինի. սկզբունքորեն այս նախագծի ընդունումը կախված է միայն Կոնգրեսից:
Իհարկե միգրացիոն նման փոփոխությունն ի նպաստ ԱՄՆ—ի կլինի, հիմք կդառնա «ուղեղների ներգաղթի» համար, ինչը ցանկացած պետության համար զարգացման խթան է: Արևմտյան երկրների մեծամասնության համար այս մեխանիզմը նորարարություն չէ, նմանատիպ տարբերակներ վաղուց են գործում ներգաղթի կարգավորման ոլորտում:
