Սոցիալիստների ուղերձը պահպանողականներին
Եվրոպական սոցիալիստների կուսակցությունը հայտարարեց, որ չի աշխատի ծայրահեղ աջ ուժերի հետ հաջորդ Եվրախորհրդարանում։ Սա քաղաքական հռչակագիր է, որն ուղղված է նրանց պահպանողական մրցակիցներին՝ Եվրոպական ժողովրդական կուսակցությանը (ԵԺԿ), որը դուռ է բացել որոշ աջակողմյան կուսակցությունների համար:
«Ես այստեղ եմ՝ Բեռլինում՝ ողջ Եվրոպայի սոցիալիստ և սոցիալ-դեմոկրատ առաջնորդների աջակցությամբ, որպեսզի ևս մեկ անգամ ասեմ՝ ոչ մի համագործակցություն ծայրահեղ աջերի հետ», — շաբաթ օրը հայտարարել է հունիսի ընտրություններին սոցալիստների գլխավոր թեկնածու Նիկոլաս Շմիտը:
Նախորդ շաբաթ POLITICO-ի և Studio Europa Maastricht-ի կողմից կազմակերպված բանավեճում ԵԺԿ-ի գլխավոր թեկնածու Ուրսուլա ֆոն դեր Լեյենը, ով հավակնում է Եվրահանձնաժողովի նախագահի պաշտոնի երկրորդ ժամկետին, պարզաբանեց, որ չի աշխատի ազգայնական «Ինքնություն և ժողովրդավարություն» խմբի հետ, որը ներառում է ծայրահեղ աջ «Այլընտրանք Գերմանիայի համար» կուսակցությունը։
Բայց նա նշեց, որ բաց կլինի գործարքի համար Եվրոպական պահպանողականների և ռեֆորմիստների (ECR) խմբի հետ, որի անդամներն են Իտալիայի աջակողմյան «Իտալիայի եղբայրները» և Լեհաստանի ազգայնական «Իրավունք և արդարություն» կուսակցությունը։
Սպասվում է, որ երկու խմբերը կավելացնեն իրենց ներկայությունը հաջորդ Եվրախորհրդարանում, ըստ POLITICO-ի հարցումների արդյունքի:
2019 թվականին ֆոն դեր Լեյենը նշանակվել է ԵԺԿ-ի, սոցիալիստների, կանաչների և ազատական «Նորացնել Եվրոպա» խմբի աջակցությամբ։
Հռչակագիրը, որը ստորագրվել է նաև Իսպանիայի վարչապետ Պեդրո Սանչեսի և կլիմայի նախկին հանձնակատար Ֆրանս Տիմերմանսի կողմից, կոչ է անում «բոլոր ժողովրդավարական եվրոպական կուսակցություններին» հետևել սոցիալիստների օրինակին և «խստորեն մերժել ցանկացած նորմալացում, համագործակցություն կամ դաշինք ծայրահեղ աջերի հետ»:
