Շտապ վավերացում է հարկավոր

Գերմանիան ճնշում է գործադրում Վիկտոր Օրբանի վրա՝ արագացնելու Շվեդիայի՝ ՆԱՏՕ-ին անդամակցելու հայտի հաստատումը այն բանից հետո, երբ Հունգարիայի ղեկավարի իշխող «Ֆիդես» կուսակցությունը երկուշաբթի օրը հետաձգեց վավերացումը: Գրում է POLITCO-ն։

«Մենք կարծում ենք, որ այժմ սա դաշինքին հավատարմության և, ընդհանրապես, բարեկամական պահվածքի խնդիր է ԵՄ երկրների միջև, որ պետք է տեղի ունենա շատ արագ», — երեքշաբթի Բեռլինում լրագրողներին ասաց գերմանացի բարձրաստիճան պաշտոնյան:

Հունգարիան ՆԱՏՕ-ի միակ անդամն է, որը դեռ չի հաստատել ռազմական դաշինքին միանալու Շվեդիայի հայտը:

Ամիսների ձգձգումից հետո հունվարին Օրբանը պաշտոնապես աջակցեց Շվեդիայի թեկնածությանը, սակայն այն դեռ պետք է վավերացվի Հունգարիայի խորհրդարանի կողմից:

Խորհրդարանական քվեարկությունը պետք է ձեւական բնույթ կրի, քանի որ Օրբանի իշխող «Ֆիդես» կուսակցությունը հարմարավետ մեծամասնություն ունի:

Սակայն Ֆիդեսի ղեկավարները երկուշաբթի օրը Շվեդիայի վարչապետ Ուլֆ Քրիսթերսոնից պահանջեցին այցելել Բուդապեշտ մինչև խորհրդարանական քվեարկությունը:

Քրիսթերսոնը բացառել է Շվեդիայի հայտի շուրջ հետագա բանակցությունների հնարավորությունը Բուդապեշտի հետ, սակայն ասել է, որ պատրաստ կլինի հանդիպել Օրբանի հետ այն բանից հետո, երբ Հունգարիայի խորհրդարանը կվավերացնի դիմումը:

«Եվրամիության գործընկերների նման այցերը միանգամայն նորմալ են, բայց դրանք չպետք է կապվեն այս կերպ»,- ասել է նույն գերմանացի պաշտոնյան։