Բլինքենը պաշտպանում է Ուկրաինայի խաղաղության առաջարկը և զգուշացնում Չինաստանի դեմ
ԱՄՆ-ը քննադատել է Չինաստանի խաղաղության առաջարկը Ուկրաինայի վերաբերյալ ՝ ասելով, որ դա միայն կսառեցնի հակամարտությունը և ժամանակ կտա Ռուսաստանին վերազինվելու համար, գրում է Bloomberg-ը:
ԱՄՆ պետքարտուղար Էնթոնի Բլինքենը երեքշաբթի ասել է, որ ԱՄՆ-ն աջակցում է Ուկրաինայի խաղաղության առաջարկին, որը պահանջում է ռուսական բոլոր զորքերի դուրսբերումն այդ տարածքից և դեմ է այլընտրանքային առաջարկներին, որոնք ձեռնտու են Մոսկվային։
Ամերիկացի բարձրաստիճան դիվանագետը պաշտպանել է Կիևի առաջարկը Ժողովրդավարության գագաթնաժողովի վիրտուալ նիստի ժամանակ, որի ընթացքում Ուկրաինայի արտաքին գործերի նախարար Դմիտրի Կուլեբան մանրամասնել է 10 կետերը: Սպասվում էր, որ նախագահ Վլադիմիր Զելենսկին վիրտուալ ելույթ կունենա, բայց նա այցով գտնվում էր առաջնագծին սահմանակից շրջաններում։
«Մենք բոլորս պետք է շատ տեղյակ լինենք, և զգուշանանք նրանից, ինչը կարող է թվալ որպես լավ նպատակադրված ջանքեր, ինչպիսիք են հրադադարի կոչերը, որոնք կարող են հանգեցնել հակամարտությունը սառեցնելու, թույլ տալով Ռուսաստանին ամրապնդել ձեռք բերված հաջողությունները և պարզապես օգտագործել ժամանակը հանգստանալու և վերազինվելու, այնուհետև նորից հարձակվելու համար», — ասել է Բլինքենը:
Բլինքենը չի հիշատակել Չինաստանը, սակայն Պեկինի խաղաղության առաջարկն ակնհայտորեն եղել է նրա քննադատության թիրախը։
Կուլեբան ընդգծել է, որ Ուկրաինայի կառավարությունն ու ժողովուրդը չեն հանդուրժի մասնակի միջոցներ։ «Ռուսաստանը պետք է դուրս գա Ուկրաինայի տարածքի յուրաքանչյուր քառակուսի սանտիմետրից»,- ասել է նա։