Հետխորհրդային շրջանի ամենակարևոր ընտրությունները կկայանան այս տարի․ ինչ սպասել
Մոլդովայի խորհրդարանը հինգշաբթի քվեարկեց սեպտեմբերի 28-ին խորհրդարանական ընտրություններ անցկացնելու օգտին, որը կարող է զգալիորեն կրճատել նախագահ Մայա Սանդուի եվրոպամետ PAS կուսակցության մանդատների թիվը: Այս մասին գրում է POLITICO-ն։
Նախագծին հավանություն է տվել 57 պատգամավոր, 32-ը ձեռնպահ են մնացել։ Ակնկալվում է, որ քվեարկությունը կլինի խիստ մրցակցային և կարող է վերափոխել Մոլդովայի քաղաքական լանդշաֆտը:
Սանդուն, ով ձգտում է ավելի սերտացնել Մոլդովան Եվրամիության հետ և հեռանալ Մոսկվայի հետ երկրի պատմական կապերից, բախվում է ընդդիմության աճող մարտահրավերին: Նախկին գլխավոր դատախազ Ալեքսանդր Ստոյանոգլոն, ով մոտ էր նախորդ տարվա նախագահական մրցավազքում Սանդուին հաղթելուն, այժմ գլխավորում է երեք կուսակցություններից բաղկացած կոալիցիան՝ PAS-ի մեծամասնությունը վիճարկելու համար:
Ըստ խորհրդարանի նախագահ Իգոր Գրոսուի, սեպտեմբերին կայանալիք քվեարկությունը «որոշիչ» կլինի երկրի ապագայի ձևավորման համար:
«Կամ մենք դեն ենք նետում այն ամենը, ինչին հասել ենք արդիականացման և ԵՄ ինտեգրման ճանապարհին, կամ առաջ ենք շարժվում դեպի խաղաղություն և զարգացում», — չորեքշաբթի ասաց Գրոսուն՝ հայտարարելով ընտրություններն անցկացնելու PAS-ի որոշումը:
«Մեր նպատակն է ապահովել, որ Մոլդովան մնա խաղաղության ճանապարհին, խուսափի Կրեմլի ազդեցության տակ ընկնելուց և պահպանի իր ինքնիշխանությունն ու ազատությունը»,- հավելել է նա։
Մոլդովան ռուսական միջամտության երկար պատմություն ունի, որտեղ Մոսկվան բազմիցս մեղադրվում է քաղաքական կուսակցություններին աջակցելու և ապատեղեկատվություն տարածելու մեջ: Նման մտահոգություններ են հնչել 2024 թվականի հոկտեմբերի 20-ին կայացած վերջին ընտրությունների ժամանակ, որոնք համընկել են ԵՄ անդամակցության հարցով հանրաքվեի հետ։
