Ի՞նչ ցույց տվեցին ընտրությունները

Բավարիան և Հեսսեն վերընտրում են քրիստոնեա-դեմոկրատներին՝ հանդիմանելով երկրի կառավարող կոալիցիային։ Այս մասին գրում է The Economist-ը(State elections give a boost to Germany’s far right):

Գերմանացիները հայտնի են այն հանգամանքով, որ միշտ հետևում են կանոններին, սակայն «լուսացույց»-ին լուրջ դիմադրություն են ցույց տալիս։ Այսպես է կոչվում երկու տարի առաջ կենտրոնական իշխանությունը գլխավորելու համար ստեղծված ձախ կենտրոնամետ կոալիցիան: Անունը ստացել է իր բաղկացուցիչ կուսակցությունների գույներից։ Կարմիրը սոցիալ-դեմոկրատներն են (SPD), դեղինը` ազատ դեմոկրատները (FDP), իսկ կանաչը, իհարկե, Կանաչները: Բայց դատելով հոկտեմբերի 8-ին գերմանական երկու կարևոր նահանգներում կայացած ընտրություններից՝ գերմանական հանրությանը չեն հետաքրքրում քաղաքական լուսացույցի արգելող ու թույլատրելի ազդանշանները, և այն կտրուկ թեքվում է դեպի աջ։

Կենտրոնական Գերմանիայի Հեսսեն նահանգը և հարավային Բավարիան, որն ամենամեծն է տարածքով, կազմում է երկրի բնակչության գրեթե մեկ քառորդը։ Զարմանալի չէ, որ այնտեղ տեղի ունեցած միաժամանակյա ընտրությունները դիտվում էին որպես ընդհանուր քաղաքական միտումների ազդարար։ Եվ այս միտումները լավ բան չեն խոստանում կանցլեր Օլաֆ Շոլցի և նրա կոալիցիայի համար: Երկու նահանգներում էլ լուսացույցի երեք կուսակցություններն էլ ավելի վատ են հանդես եկել, քան հինգ տարի առաջ:

Եվրոպային ծանր շրջան է սպասվում

«Լուսացույցի» պարտությունը աջ թևի հաղթանակն էր: Հեսսենում ներկայիս կառավարությունը գլխավորում է աջ կենտրոնամետ քրիստոնեա-դեմոկրատական ​​միությունը, որը երկար ժամանակ եղել է Գերմանիայի ամենամեծ կուսակցությունը: Բավարիայում կառավարությունը գլխավորում է ՔԴՄ-ի քույր կուսակցությունը՝ քրիստոնեա-սոցիալական միությունը (CSU), իսկ այս կառավարությունը գլխավորում է ՔՍՄ-ի նախագահ Մարկուս Սյոդերը։ Այս կուսակցությունը իշխանություն է՝ սկսած 1957 թվականից։ Ընտրությունների ձայների հաշվարկը գրեթե ավարտված է. ՔԴՄ-ն Հեսսենում հավաքել է 35 տոկոս, իսկ Բավարիայում՝ ՔՍՄ-ն՝ 37 տոկոս: Այս զույգ կուսակցությունները մնում են ամենամեծն իրենց նահանգներում և գրեթե անկասկած, կրկին կգլխավորեն կառավարական նոր կոալիցիաներ:

Շատ ավելի մեծ անակնկալ էր երկու ծայրահեղ աջ կուսակցությունների ուժեղացումը։ Աջակողմյան «Այլընտրանք Գերմանիայի համար» կուսակցությունը, որից գերմանական քաղաքական հիմնական հոսքը խուսափում էր իր հակամիգրացիոն հռետորաբանության և ծայրահեղական հակումների պատճառով, երկու նահանգներում էլ երկրորդ տեղում էր: Բավարիայում հավաքել է ձայների 16 տոկոսը կամ վեց տոկոսով ավելի, քան 2018 թվականի նախորդ ընտրություններում։ Հեսսենում կուսակցության օգտին քվեարկել է ընտրողների 18 տոկոսը, ինչը հինգ տոկոսով ավելի է նախորդ ցուցանիշից։

Նման կտրուկ տեղաշարժը դեպի աջ հանգեցրել է նրան, որ պահպանողականներին այժմ բաժին է ընկնում ձայների երկու երրորդը Բավարիայում, իսկ կեսից ավելին՝ Հեսսենում: Սա լուրջ ահազանգ է «լուսացույցի» համար, որը մոտենում է իր իշխանության ժամկետի կեսին։ Բայց որքան էլ պարադոքսալ է, Շոլցի կառավարության նման վտանգավոր իրավիճակը նրան ավելի լավ հնարավորություն է տալիս ծառայելու մինչև իր լիազորությունների ավարտը: Քանի որ նրա կրտսեր գործընկերները՝ Ազատ դեմոկրատները և Կանաչները, լավ ջախջախում ստացան ընտրություններում, ո՛չ նրանք, ո՛չ էլ Շոլցի կուսակցությունը շահագրգռված չեն լուծարել լուսացույցի կոալիցիան:

«Այլընտրանք Գերմանիայի համար» կուսակցության ժողովրդական աջակցության աճը անհանգստացնում է շատ գերմանացիների: Այնուամենայնիվ, կուսակցության ավելի ուժեղ ելույթը դժվար թե նրան ավելի մեծ ուժ տա: Մնացած բոլոր կուսակցությունները շարունակում են մերժել ծայրահեղ աջերի հետ կոալիցիաներ ստեղծելու գաղափարը։

Շոլցը և նրա կոալիցիան, անկասկած, լսեցին այս նախազգուշացումները: Վերջերս լուսացույցը նկատելիորեն խստացրել է իր հռետորաբանությունը ներգաղթի հարցում, իսկ Կանաչների կուսակցությունը մեղմացրել է իր բնապահպանական հավակնությունները։ Թերևս մի երկու տարի հետո նրանց վառ գույները կրկին գրավեն ընտրողներին։