Հունաստանն ու Թուրքիան աջակցում են միմյանց միջազգային հարթակներում
Հունաստանը և Թուրքիան որոշել են աջակցել միմյանց համապատասխանաբար ՄԱԿ-ի Անվտանգության խորհրդում և Միջազգային ծովային կազմակերպությունում, ինչը բնութագրվում է որպես «նոր դարաշրջան» իրենց երկկողմ հարաբերություններում՝ վերջին ամիսներին սաստկացած տագնապից հետո: Այս մասին գրում է EURACTIV-ը:
Հունաստանի արտաքին գործերի նախարար Նիկոս Դենդիասը և նրա թուրք գործընկեր Մևլութ Չավուշօղլուն երկուշաբթի Բրյուսելում պայմանավորվել են աջակցել Աթենքի թեկնածությունը Անվտանգության խորհրդի ոչ մշտական անդամի պաշտոնում 2025-26 թվականներին և Անկարայի հայտը Միջազգային ծովային կազմակերպության (IMO) գլխավոր քարտուղարության համար:
Այս քայլը հունական լրատվամիջոցները բնութագրեցին որպես երկու երկրների հարաբերությունների «նոր դարաշրջանի» արդյունք, որոնք ամիսներ շարունակ լարված են՝ գրեթե զրոյական կապի ուղիներով:
Սակայն ամեն ինչ սկսեց փոխվել Թուրքիայում տեղի ունեցած երկրաշարժից և Աթենքի ցուցաբերած համերաշխությունից հետո։
Հունական in.gr լրատվական կայքը հայտնել է, որ երկու երկրների միջև քաղաքական մթնոլորտը փոխվել է, և որ երկուսն էլ ցանկանում են պահպանել ոչ պաշտոնական «հանգստության մորատորիումը»:
Ինչ վերաբերում է ՄԱԿ-ի Անվտանգության խորհրդում Հունաստանի թեկնածությանը, Թուրքիան, նրա մերձավոր դաշնակիցները և Ռուսաստանը համարվում էին այն արգելափակելու հնարավոր սպառնալիքներ: Այս գործարքով Աթենքի աղբյուրներն այժմ կարծում են, որ երկու հիմնական խոչընդոտներից մեկը հաղթահարվել է:
