Այլընտրանքային «Նոբելյան մրցանակ» Բաքվի անօրինությունները լուսաբանելու համար
Ադրբեջանցի լրագրող Խադիջա Իսմայիլովան շվեդական «Right Livelihood Award Foundation» հիմնադրամի կողմից պարգևատրվել է «պետական բարձրագույն մակարդակներում կոռուցպիոն բացահայտումների գործում ցուցաբերած արիության և տոկունության համար»: Այդ «ճիշտ կենսակերպի տիտղոսը» երբեմն անվանում են այլընտրանքային «Նոբելյան մրցանակ»:
2014 թ. դեկտեմբերին լրագրողը ձերբակալվել էր, նրան մեղադրանք էին առաջադրել Ադրբեջանի քրեական օրենսգրքի մի քանի հոդվածներով, այդ թվում անօրինական ձեռներեցության համար: Ավելի ուշ Իսմայիլովան դատապարտվել էր 7,5 տարվա ազատազրկման, սակայն նրան ազատ արձակելու արշավն արդյունք տվեց 2016 թվականի մայիսին (ձերբակալված է մնացել 537 օր):
Իսմայիլովայի դիտարկմամբ ադրբեջանական իշխանությունները փորձել են, իրեն ձերբակալելով, կասեցնել լրագրողական հետաքննությունները, սակայն ադրբեջանցի լրագրողի գործը շարունակել են նրա գործընկերները: Ավելին՝ ձերբակալության արդյունքում աճել է քննադատությունը իշխանությունների հասեցին:
Խադիջա Իսմայիլովան բացահայտումներ է ներկայացրել, որ նախագահն ու իր ընտանիքը երկրի տնտեսությունը մոնոպոլիզացրել են և հանդիսանում են Ադրբեջանում կոռուպցիոն ձեռնարկների հիմնական շահառուն: Լրագրողի դիտարկմամբ ամենակարևորն այն է, որ իրեն հաջողվել է քանդել այն առասպելը, թե նախագահը կաշառակերության դեպքերին տեղյակ չի եղել:
Ադրբեջանում լրագրողների հանդեպ բռնությունը իշխանությունների առանցքային մարտավարությունն է, ձերբակալությամբ ու քրեական հաշվեհարդարով ահաբեկելով՝ ալիևյան ռեժիմը փորձում է լռեցնել «իրականության ձայնը»: Քաղաքական դրդապատճառներով այսօր էլ շուրջ 160 անձինք շարունակում են գտնվել կալանավայրերում:
Վերջին շրջանի ամենաաղմկահարույց ձերբակալություններից էին «Թուրան» գործակալության տնօրեն Մեհման Ալիևի և Վրաստանում առևանգված լրագրող Աֆգան Մուխտարլիի ազատազրկման դեպքերը: Ինչն առաջացրել միջազգային հանրության և ադրբեջանական քաղաքացիական հասարակության կառույցների վրդովմունքը:
Նման պայմաններում Ադրբեջանի բռնապետ նախագահ Իլհամ Ալիևն իրեն իրավունք է վերապահում ՄԱԿ-ի Գլխավոր ասամբելայի ամբիոնից խոսել իրենց երկրում մարդու իրավունքների պաշտպանվածության և ժողովրդավարության մասին. դատողություններ, որոնք բացարձակ չեն դիմանում քննադատությանը: