Հայաստանի պետական պարտքը 2016 թվականին աճել է 17 տոկոսով՝ 857 մլն դոլարով
Համաձայն ՀՀ ֆինանսերի նախարարության տվյալների երկրի պետական պարտքը 2016 թ. դեկտեմբերի 31-ի դրությամբ կազմում է շուրջ 6 մլրդ դոլար (5.934.776 հզր դոլար՝ դրամի փոխարժեքով 2.872.075 մլն դրամ):
Մեկ տարվա ընթացքում ՀՀ պետական պարտքը աճել է գրեթե 17 տոկոսով (857 մլն դոլարով), 2015 թ. դեկտեմբերի 31-ի դրությամբ այն կազմում էր 5.077.693 հզր դոլար՝ դրամի փոխարժեքով 2.456.334 մլն դրամ: Հայաստանի կառավարության արտաքին պարտքը տարեվերջին կազմում էր 4,8 մլրդ դոլար (2322 մլրդ դրամ), իսկ ներքին պարտքը՝ 1,14 մլրդ դոլար (550 մլրդ դրամ):
Նշենք նաև, որ համաձայն ԱՄՆ Կենտրոնական հետախուզական վարչության տվյալների Հայաստանի ընդհանուր արտաքին պարտքը (ներառում է պետական և մասնավոր պարտքը) 2016 թ. դեկտեմբերի 31-ի տվյալներով կազմում է ավելի քան 8,36 մլրդ դոլար:
Արժույթի միջազգային հիմնադրամի (ԱՄՀ) տվյալներով Հայաստանի անվանական ՀՆԱ-ն 2016 թվականին կազմել է 10,754 մլրդ դոլար, նախորդ տարվա համեմատությամբ աճել է 225 մլն դոլարով (2015 թվականին կազմում էր 10,529 մլրդ դոլար): Այդպիսով Հայաստանի պետական պարտքը կազմում է ՀՆԱ-ի 55 տոկոսը, մինչդեռ ընդամենը 2014 թվականին կազմում էր ՀՆԱ-ի 44 տոկոսը: ԱՄՀ-ի կանխատեսմամբ արդեն իսկ 2018 թվականին Հայաստանի պետական պարտքը կգերազանցի ՀՆԱ-ի 60 տոկոսը: