Ինչ է կատարվում Վրաստանում
Վաշինգտոնը հայտարարել է Վրաստանի կառավարության բարձրաստիճան պաշտոնյաների համար նոր ֆինանսական սահմանափակումների և ճամփորդական արգելքների մասին՝ ռուսական ոճով «օտարերկրյա գործակալների» օրենքի դեմ բողոքի ցույցերը բռնությամբ ճնշելուց հետո: Այս մասին գրում է POLITICO-ն։
Պատժամիջոցների են բախվում նաև երկու նշանավոր դեմքեր, որոնք կապված են վրացական ծայրահեղ աջ Alt-Info լրատվամիջոցի հետ, որը կոչ է արել հարձակումներ գործել ժողովրդավարության կողմնակիցների, լրագրողների և LGBTQ+ համայնքի վրա:
Միևնույն ժամանակ, ԱՄՆ Պետդեպարտամենտը հաստատել է, որ վիզային սահմանափակումներ կսահմանի ավելի քան 60 վրացիների և նրանց ընտանիքների համար՝ «Վրաստանում ժողովրդավարությունը խարխլելուն» մեղսակցության պատճառով։ Նշվում է, որ ցուցակում, որը չի հրապարակվել, ներառված են պետական պաշտոնյաներ, «ովքեր չարաշահել են իրենց լիազորությունները՝ սահմանափակելու վրաց ժողովրդի հիմնարար ազատությունները»:
«Այսօրվա գործողությունն ընդգծում է մեր անհանգստությունը Վրաստանում հակաժողովրդավարական գործողությունների հետևանքների և հիմնական անձանց կողմից իրենց նպատակներին հասնելու համար բռնություն և ահաբեկում կիրառելու ջանքերի վերաբերյալ», — ասել է ահաբեկչության և ֆինանսական հետախուզության հարցերով ֆինանսների փոխնախարարի պաշտոնակատար Բրեդլի Սմիթը։
ԵՄ-ն սառեցրել է դաշինքին միանալու Վրաստանի հայտը օրենսդրական փաթեթի պատճառով, որը Արևմուտքի կողմից աջակցվող ՀԿ-ներին և ԶԼՄ-ներին որակելու է որպես «օտարերկրյա գործակալներ» և փաստացիորեն արգելում է միասեռական հարաբերությունների հանրային ներկայացուցչությունը: Բրյուսելը, սակայն, դադարել է կիրառել սեփական պատժամիջոցները:
Վրաստանի արտաքին գործերի նախարարությունն անմիջապես չի պատասխանել մեկնաբանության խնդրանքին։
