Ռուսաստանի և Իսրայելի դիվանագետները գաղտնի զրուցել են

Ռուս պաշտոնյաները բազմիցս հասկացրել են իսրայելական իշխանություններին, որ երկու պետությունների հարաբերությունները ճգնաժամային չեն, և չպետք է հեռուն գնացող եզրակացություններ անել միայն հրեական գործակալության հետ ունեցած կոնֆլիկտի պատճառով։ Իրավիճակը, հետևաբար, չպետք է ավելորդ դրամատիկ դարձնել, քանի որ խնդրի լուծումը բացառապես իրավական դաշտում է։ Հայտնում է իրանական լրատվամիջոցը։

 Հրեական գործակալության գործունեությունը դադարեցնելու ռուսական կողմի որոշումից հետո, սակայն, եբրայերեն լրատվամիջոցները խոսեցին ռուս և իսրայելցի դիվանագետների միջև որոշ գաղտնի բանակցությունների մասին՝ «ճգնաժամային իրավիճակը» լուծելու նպատակով, ինչպես ընդգծվում է տարբեր լրատվամիջոցներում։

Մասնավորապես, իսրայելական Yediot Ahronotհ հայտնի հրատարակությանը կից Waynet կայքը հայտնել է, որ Մոսկվայի և Թել Ավիվի միջև ներկայումս ընթանում են «գաղտնի բանակցություններ»՝ կապված «սուր ճգնաժամային իրավիճակի» կարգավորման անհրաժեշտության հետ։ Սա պայմանավորված է ՌԴ արդարադատության նախարության միջնորդությամբ ( Հրեական համայնքի փակման վերաբերյալ ):

Հրապարակումը մատնանշում էր բանակցությունների գաղտնի բնույթը, բայց, միևնույն ժամանակ, հայտնում, որ Մոսկվան որոշ հուսադրող ազդանշաններ է ուղարկել Թել Ավիվ։ Մասնավորապես, Մոսկվան Թել Ավիվ ուղարկած «մեսիջում» նշում է, որ այս խնդիրը չպետք է մեկնաբանվի քաղաքական տեսանկյունից։ Դա քաղաքականության հետ կապ չունի և պետք է լուծվի բացառապես օրինական ճանապարհով։

Հրապարակման մեջ չի նշվում, թե որքանով են գոհ իսրայելցի պաշտոնյաները Մոսկվայի այս «գաղտնի ուղերձից»։ Սակայն Waynet կայքն ընդգծել է, որ Թել Ավիվը նույնպես պատասխան է ուղարկել Մոսկվային, որտեղ ասվում է, որ Իսրայելը մտադիր չէ «անտեղի» քաղաքականացնել խնդիրը, բայց, միևնույն ժամանակ, հույս ունի, որ ճգնաժամը շուտափույթ լուծում կստանա և լարվածությունը կթուլանա։

Ակնհայտ է, որ Մոսկվան և Թել Ավիվը դեռևս այլ կերպ են մեկնաբանում Հրեական գործակալության շուրջ ստեղծված իրավիճակը։

Waynet կայքը նաև շեշտել է, որ Իսրայելական պատվիրակաթյան անդամների ( ԱԳՆ իրավաբան Թամար Կապլանի գլխավորությամբ ) մուտքի վիզաների տրամադրման ուշացումը, կարող է խանգարել վերջինիս ներկա գտնվել Մոսկովյան դատավարությանը՝ կապված Հրեական գործակալության փակման հետ։

Իսրայելի կառավարության պաշտոնյաներից մեկի խոսքով, ում խոսքերը նույնպես մեջբերել է կայքը, հույս կա, որ այս ճգնաժամն ի վերջո կլուծվի, սակայն, դա չի նշանակում, որ ընդհանուր ճգնաժամային իրավիճակը Ռուսաստանի հետ հարաբերություններում նույնպես  կլուծվի ինքնաբերաբար։ Այն ավելի բարդ է, քանի որ պայմանավորված է արևմտյան երկրների և Ռուսաստանի միջև առկա ճգնաժամով։ Իսրայելը, ըստ այս աղբյուրի, նույնպես «արևմտյան աշխարհի մի մասն է», թեև գտնվում է Մերձավոր Արևելքում։

Ռուսաստանում այս կազմակերպությունը միշտ ընկալվել է որպես խնդրահարույց կազմակերպություն, քանի որ հաճախ նրան պատասխանատու են համարում Ռուսաստանից, այսպես կոչված, «ուղեղների արտահոսքի» համար։ Այն, իբր, աջակցել է Ռուսաստանից հեռանալ նրանց, ովքեր գոհ չեն երկրի ներկայիս քաղաքական իրավիճակից, և նույնիսկ համապատասխան քարոզչություն է իրականացրել։ Իսրայելի կառավարության աղբյուրը չի հերքել դա, սակայն, ըստ վերջինիս, Ռուսաստանում հրեական գործակալության աշխատանքը որևէ կերպ չի կարող կապված լինել Իսրայելի պաշտոնական դիրքորոշման հետ՝ պայմանավորված Ուկրաինայի տարածքում Ռուսաստանի կողմից իրականացվող հատուկ գործողությամբ։

Ակնհայտ է, որ Ռուսաստանի արդարադատության նախարարության միջնորդությունը՝ կապված Հրեական գործակալության գործունեության կասեցման հետ, շարունակությունն էր այն լարվածության, որն արդեն ձևավորվել էր Մոսկվայի և Իսրայելի միջև՝ սկսած Ուկրաինական հակամարտության ռազմական փուլից։ Իսրայելը, ինչպես գիտեք, հասկացրեց, որ չի ցանկանում սրել հարաբերությունները Մոսկվայի հետ, թեև դեմ է հակամարտության ռազմական լուծմանը։ Սակայն Իսրայելի կառավարությունը միաժամանակ հայտարարեց, որ Թել Ավիվը չի կարող համերաշխ չլինել Ռուսաստանի վերաբերյալ արևմտյան պետություններիմի շարք որոշումների հետ։ Խնդիրը, սակայն, այն է, որ այն որոշումները, որոնցից Իսրայելը, ըստ իր պաշտոնյաների, չի կարողանում «հեռավորություն պահել», ակնհայտորեն անբարյացակամ են Ռուսաստանի նկատմամբ։

Հրեական գործակալությունը իրեն ներկայացնում է որպես շահույթ չհետապնդող կազմակերպություն, որը նպաստում է Իսրայել ներգաղթին կամ հրեաների հայրենադարձությանը: Միաժամանակ, չի կարելի հերքել, որ այս պահին Ռուսաստանից հեռանալու խնդիրը, եթե չի կրում բացահայտ քաղաքական բնույթ, ապա բացահայտ քաղաքականացվում է առանձին լրատվամիջոցների կողմից։ Հետևաբար որոշ հիմքեր կարելի է գտնել ռուսական իշխանությունների գործողություններում։

Միևնույն ժամանակ, հարկ է նշել, որ Հրեական գործակալության աշխատանքը սկսվել է ԽՍՀՄ շրջանից և շարունակվել ժամանակակից Ռուսաստանում, և դրա փակման ներկայիս հարցը միանշանակ վկայում է ռուս-իսրայելական հարաբերությունների վատթարացման մասին։ Այժմ դրա փակումը կարող է խանգարել, ինչպես ասում են Իսրայելում, «հրեաների վերամիավորմանը իրենց պատմական հայրենիքում»։ Նշենք, որ վերջին երկու տասնամյակների ընթացքում ավելի քան մեկ միլիոն հրեա լքել է Ռուսաստանը և մշտապես տեղափոխվել Իսրայել։

Սկսած ուկրաինական հակամարտությունից՝ Մոսկվայի և Թել Ավիվի հարաբերությունները նկատելիորեն սրվել են։ Այս սրացման պատճառները բավականին շատ են, և ոչ բոլորն են անմիջականորեն կապված ուկրաինական հակամարտության հետ։ Այնուամենայնիվ, Մոսկվային, անկասկած, անհանգստացնում է այն փաստը, որ հրեական գործակալությունը այս պահին շատ ակտիվ է նպաստում ուկրաինացի փախստականների մեկնելուն Իսրայել, մինչդեռ, Մոսկվայի կարծիքով, հաճախ չափից դուրս դրամատիզացնում է իրավիճակը։ Այն, իհարկե, չի կարող չանդրադառնալ բուն Ռուսաստանում ընդհանուր քաղաքական իրավիճակի վրա։