Միջուկային հոլոքոստից պաշտպանող մոսկովյան բունկերների վերաբերյալ ԱՄՆ պաշտպանության նախարարության զեկույցը. «Daily Star»
Ներկայացնում ենք բրիտանական «Daily Star» պարբերականի «Վլադիմիր Պուտինը բունկերներ է պատրաստում ԱՄՆ-ի կողմից Ռուսաստանին միջուկային հարված հասցնելու սպառնալիքից պաշտպանվելու համար»:
Վլադիմիր Պուտինն, ըստ երևույթին, համոզված է, որ ԱՄՆ—ը պլանավորում է իրեն հեռացնել իշխանությունից, դրա համար նա հսկայական ստորգետնյա համալիրներ է կառուցում, որոնք կարող են մինչև 10 հազար մարդ տեղավորել: Այդ մասին նշված է Պենտագոնի փորձագետների կողմից ներկայացած զեկույցում:
Ինչպես հաղորդում է «Times» պարբերականը, այդ միջուկային բունկերները գտնվում են Մոսվկայի տակ՝ 985 ֆուտ (մոտ 300 մետր) խորությամբ, և ռուսական իշխանությունները դրանք պատրաստում են միջուկային հոլոքոստից պաշտպանության համար:
«Կրեմլի տակ խորը ստորգետնյա համալիրը և Մոսկվայի պետական համալսարանի մերձակայքում ղեկավարության համար նախատեսված հսկայական ստորգետնյա բունկերը նախատեսված են ռազմական դրության պայմաններում ազգային հրամանատարության համար», — նշված է զեկույցում:
«Կենսապահովման համար նախատեսված բարձր արդյունավետություն ունեցող համակարգերը կարող են հնարավորություն տալ միջուկային հարձակումից հետո մի քանի ամիս անկախ օպերացիաներ իրականացնելու»:
Համարվում է, որ այդ պուտինյան բունկերները կապված են Մոսկվայի տակ գտնվող բունկերների ցանցի և «Վնուկովո» օդանավակայանի VIP- տերմինալի հետ:
Դեռ նախքան Դոնալդ Թրամփի նախագահ ընտրվելը գրված այս զեկույցում, խոսվում է այն բանի մասին, որ Պուտինի կարծիքով ԱՄՆ-ը ցանկանում է իրեն հեռացնել իշխանությունից՝ աշխարհում ժողովրդավարությունն խթանելու ամերիկյան արշավի շրջանակներում: Նախորդ տարի Ռուսաստանը քաղաքացիական պաշտպանության վարժանքներ անցկացրեց, որոնց շրջանակներում մշակվում էին միջուկային հարվածի դեպքում տարհանման սցենարները:
Շատերը սպասում էին, որ Թրամփին կհաջողվեր բարելավել հարաբերությունները Պուտինի հետ, քանի որ իր ընտրական արշավի ժամանակ նա բազմիցս հայտարարել էր այդ մտադրության մասին: Սակայն այդ հույսերը վերացան այն սկանդալի բացահայտմամբ, որ Թրամփի օգնականի Կրեմլի հետ կապեր է ունեցել:
Երկու երկրների միջև լարվածությունն էլ ավելի աճեց, երբ Վաշինգտոնն ու Մոսկվան բախվեցին Սիրիայում: Երրորդ աշխարհամարտի թեման կրկին թատերաբեմ իջավ, երբ ԱՄՆ-ը խոստացավ Պուտինի մերձավոր դաշնակցի՝ Բաշար Ասադի դեմ պատասխան գործողություններ ձեռնարկել:
ԱՄՆ պաշտպանության նախարարության հետախուզական վարչության փորձագետների կողմից ներկայացված այս զեկույցը սառը պատերազմի ավարտից հետո Ռուսաստանի հնարավորությունների վերաբերյալ նմանատիպ առաջին զեկույցն է:
