«Բարգավաճ Հայաստան» կուսակցության վերածնունդը Գյումրիում
2015 թ. փետրվարյան ՀՀԿ-ԲՀԿ առճակատումից հետո, քաղաքական ներուժով երկրորդ կուսակցությունը՝ «Բարգավաճ Հայաստանը», կապիտուլացվեց: Երբ կուսակցության առաջնորդ Գագիկ Ծառուկյանն իրեն «քաղաքականությունից դուրս» հռչակեց «գաղափարակից» բհկ-ականների շարքերը զգալիորեն թեթևացան:
Այս մեկուկես տարվա ընթացքում ԲՀԿ-ն գործում էր նախկին ազդեցության իներցիայի հիմքով՝ աստիճանաբար կորցնելով իր ընտրազանգվածը: Սակայն առաջիկայում սպասվելիք ընտրությունները հարկադրում են կուսակցությանը նոր ձևով մտնել խաղի մեջ:
Վերակազմակերպվող ԲՀԿ-ի համար առաջին իրական փորձությունը կլինի Գյումրու տեղական ինքնակառավարման մարմինների ընտրությունները, որոնք տեղի են ունենալու հոկտեմբերի 2-ին ու վճռորոշ նախերգանք են լինելու խորհրդարանական ընտրություններից առաջ:
Գյումրու ՏԻՄ ընտրություններում բացահայտ առավելություն ունի գործող քաղաքապետ Սամվել Բալասանյանի կողմից գլխավորվող «իշխանական դաշինքը», իսկ «Բարգավաճ Հայաստանը» բոլոր հնարավորություններն ունի ստանձնելու «երկրորդ» պատվավոր տեղը, ինչին առավել ևս նպաստում է կուսակցության որոշումը, որ ընտրական ցուցակը գլխավորի Գյումրու պետական մանկավարժական ինստիտուտի նախկին ռեկտոր Վարդևան Գրիգորյանը: Վերջինս բավականին մեծ էլեկտորատ ունի ու կարող է կուսակցությանը զգալի քվե ապահովել՝ գրագետ քարոզչության ապահովման դեպքում:
Նման «հաղթանակը» կրկին կվերականգնի բազում քաղաքացիների հավատը կուսակցության նկատմամբ, ինչը լուրջ քաղաքական հենասյուն կլինի խորհրդարանական ընտրությունների համար: Իսկ եթե «գործին որևէ ձևով միջամտի» Գագիկ Ծառուկյանը, ԲՀԿ-ն կամրացնի իշխանություններին հիմնական այլընտրանք լինելու կարգավիճակը:
Այդպիսով՝ «Բարգավաճ Հայաստանը» կարող է լուրջ հայտ ներկայացնել կրկին «երկրորդ քաղաքական ուժը» դառնալու համար: