Հայաստանի և Թուրքիայի ղեկավարներն առաջին հանդիպումն են անցկացրել
Պատմական թշնամիներ Թուրքիայի և Հայաստանի առաջնորդներն առաջին դեմ առ դեմ հանդիպումն են անցկացրել այն բանից հետո, երբ երկու երկրները պայմանավորվել են բարելավել հարաբերությունները: Գրում է AL JAZEERA-ն։
Թուրքիայի նախագահ Ռեջեփ Թայիփ Էրդողանը և վարչապետ Նիկոլ Փաշինյանը հինգշաբթի հանդիպել են Պրահայում 44 երկրների ղեկավարների գագաթնաժողովում՝ «Եվրոպական քաղաքական համայնքի» մեկնարկի շրջանակում, որն ուղղված է Եվրոպայում անվտանգության և տնտեսական բարգավաճման խթանմանը։
Ադրբեջանի նախագահ Իլհամ Ալիևը նույնպես ներկա է գտնվել երեք առաջնորդների ոչ պաշտոնական հավաքին: Մանրամասներ այն մասին, թե ինչ են նրանք քննարկել, անմիջապես չհայտնվեց:
Թուրքիան և Հայաստանը, որոնք չունեն դիվանագիտական հարաբերություններ, նախորդ տարի պայմանավորվեցին բանակցություններ սկսել։ Երկրների կողմից նշանակված հատուկ բանագնացները բանակցությունների չորս փուլ են անցկացրել: Նրանց քննարկումների արդյունքում պայմանավորվածություն է ձեռք բերվել Թուրքիայի ամենամեծ քաղաքի՝ Ստամբուլի և Հայաստանի մայրաքաղաք Երևանի միջև չարտերային թռիչքները վերսկսելու վերաբերյալ։
Սա Անկարայի և Երևանի հաշտեցման երկրորդ փորձն է։ Թուրքիան և Հայաստանը 2009 թվականին համաձայնության են եկել պաշտոնական հարաբերություններ հաստատելու և սահմանը բացելու վերաբերյալ, սակայն համաձայնագիրը այդպես էլ չվավերացվեց Ադրբեջանի բուռն հակազդեցության պատճառով։