Այս երկրում ևս կծառայեն կանայք
Դանիան ծրագրում է կանանց զորակոչել զինվորական ծառայության, չորեքշաբթի հայտարարեց Դանիայի կառավարությունը՝ դառնալով այն մի քանի երկրներից մեկը, որտեղ կանանցից պահանջում են ծառայել զինված ուժերում: Այս մասին գրում է POLITICO-ն:
«Ավելի ուժեղ զորակոչը, ներառյալ գենդերային լիարժեք հավասարությունը, պետք է նպաստի պաշտպանական մարտահրավերների լուծմանը, ազգային մոբիլիզացիային և մեր զինված ուժերի համալրմանը», — ասել է պաշտպանության նախարար Թրոելս Լունդ Պոուլսենը մամուլի ասուլիսում։
Կանայք Դանիայում արդեն կարող են կամավոր զինվորական ծառայության անցնել։
Այժմ Դանիան Եվրոպայում երրորդ երկիրն է, որը ներդնում է կանանց զորակոչ։ Նորվեգիան և Շվեդիան իրականացրել են համապատասխանաբար 2015-ին և 2017-ին:
Պաշտոնական տվյալների համաձայն, դանիական բանակը բաղկացած է 7000-ից 9000 պրոֆեսիոնալ զինվորականներից՝ բացառությամբ հիմնական պատրաստություն անցնող ժամկետային զինծառայողների: Պարտադիր զինվորական ծառայությունը վերաբերում է 18 տարեկանից բարձր տղամարդկանց: Սակայն, քանի որ կամավորները բավարար են, ոչ բոլոր երիտասարդներն են զորակոչվում: Փոխարենը անցկացվում է վիճակահանություն։
Ելույթ ունենալով Պոուլսենի կողքին՝ վարչապետ Մետե Ֆրեդերիկսենն ասաց, որ Դանիան կերկարաձգի ծառայության ժամկետը և՛ տղամարդկանց, և՛ կանանց համար չորսից մինչև 11 ամիս՝ որպես երկրի բանակի բարեփոխման մաս: Այն նաև ներդրումներ կկատարի ցամաքային հակաօդային պաշտպանության համակարգերում:
«Դանիայում մենք չենք վերազինվում, քանի որ ցանկանում ենք պատերազմ, ավերածություններ կամ տառապանքներ: Մենք վերազինվում ենք հենց հիմա, որպեսզի խուսափենք պատերազմից և մի աշխարհում, որտեղ միջազգային կարգը վիճարկվում է», — ասաց Ֆրեդերիկսենը:
