Ֆինլանդիան և Էստոնիան կարող են միավորել իրենց հակահրթիռային պաշտպանության համակարգերը, ասել է Էստոնիայի պաշտպանության նոր նախարարը։ «Բալթիկ ծովը կդառնա ՆԱՏՕ-ի ներքին ծովը»:
Էստոնիայի և Ֆինլանդիայի հակահրթիռային պաշտպանության ինտեգրումը թույլ կտա փակել Ֆիննական ծոցը ռուսական ռազմանավերի համար, գրում է ֆինլանդական լրատվականը։ Էստոնիայի պաշտպանության նոր նախարարը վստահ է, որ Բալթիկ ծովը կդառնա ՆԱՏՕ-ի ներքին ծովը։
Ֆինլանդիան և Էստոնիան, ի թիվս այլ հարցերի, պայմանավորվել են ափամերձ գոտու պաշտպանության ինտեգրման շուրջ, ֆիննական Iltalehti թերթին ասել է Էստոնիայի պաշտպանության նոր նախարար Հաննո Պևկուրը։
Այս շաբաթ Ֆինլանդիայում Պևկուրը հանդիպել է Ֆինլանդիայի պաշտպանության նախարարի հետ: «Էստոնիայի և Ֆինլանդիայի հրթիռների հեռահարությունն ավելի մեծ է, քան Ֆիննական ծոցի լայնությունը: Սա նշանակում է, որ մենք կարող ենք համատեղել մեր հակահրթիռային պաշտպանության համակարգերը և փոխանակվել տեղեկատվությամբ», — հայտնել է Պևկուրը հարցազրույցում:
Պևկուրն ընդգծում է, որ երկրների հակահրթիռային պաշտպանության ինտեգրումը թույլ կտա փակել Ֆիննական ծոցը ռուսական ռազմանավերի համար։
«Եթե Ֆինլանդիան և Շվեդիան միանան ՆԱՏՕ-ին, ապա Բալթիկ ծովը կդառնա դաշինքի ներքին ծովը, ներկայիս իրավիճակը կփոխվի»:
2021 թվականին Էստոնիայի կողմից ձեռք բերված Իսրայելական հականավային Blue Spear հրթիռների հեռահարությունը 290 կմ է, և էստոնացիները կարող են հրթիռներն ուղղել Ֆինլանդիայի ափի ցանկացած կետի։
Ֆինլանդիայի ռազմածովային ուժերը, իրենց հերթին, ձեռք են բերել MTO-85M հականավային հրթիռներ՝ ավելի քան 100 կիլոմետր հեռահարությամբ, որոնք կարող են ուղարկվել Էստոնիայի ափ։ Հելսինկիից Տալլին հեռավորությունը 86 կիլոմետր է։
Պևկուրը հակահրթիռային պաշտպանության համակարգերի ինտեգրումը լավ գաղափար է համարում, քանի որ նրա կարծիքով Ռուսաստանին չի կարելի վստահել։
«Այժմ մենք տեսնում ենք ռուսական հատուկ գործողություն Ուկրաինայում: Բայց ամեն ինչ սկսվեց 2014 թվականին և միայն սրվեց 2022 թվականի փետրվարի 24-ին՝ Էստոնիայի անկախության օրը: Ռուսաստանի գործողությունները հնարավոր չէ սահմանափակել»:
